அன்பு

அன்பினிலே ஒருவகையாம் பாச மாகும்

அதுவன்றி இன்னொன்று நேச மாகும்

அன்பினிலே இன்பியலாம் காத லாகும்

அதற்கும்மேல் ஒன்றுண்டாம் பக்தி யாகும்

அன்பிற்கு அடைக்கும்தாழ் இல்லை என்றார்

அதற்குண்டோ ஒப்புவமை சொல்லு தற்கே

அன்பிற்கே காவியங்கள் ஆக்கித் தந்தார்

அதன்சக்தி எழுத்தினிலே வடித்து வைத்தார்



ஒருசொல்தான் உலகத்தை ஆட்டி வைக்கும்

உள்ளத்தைக் கோயிலாக்கி நிறைந் திருக்கும்

இருவரையே இணைத்துத்தான் இன்பம் சேர்க்கும்

இணைப்பினிலே புது உயிரைப் படைத்துக் காட்டும்

வரும்துயரம் அன்புணர்வால் மறைந்து ஓடும்

வற்றாத அமைதியிலே அழைத்துச் செல்லும்

உருக்கிவிடும் தன்மையதாம் எல்லை இல்லை

உயிர்காக்கும் அன்பின்றி வாழ்வு முண்டோ